علیؑ کی تنہائی
عقیدتوں میں دبی ہے علیؑ کی تنہائی
وگرنہ بابِ جلی ہے علیؑ کی تنہائی
یتیم اپنی غریبی کو بھول کر روئے
جب آج ان پہ کھلی ہے علیؑ کی تنہائی
نہیں ملے گی تجھے خانقاہ و مسجد سے
کسی کنویں میں پڑی ہے علیؑ کی تنہائی
سقیفیوں کی اَطاعت امامؑ سے دوری
انہی سے مل کے بنی ہے علیؑ کی تنہائی
سقوطِ دین پہ روتی ہیں فاطمہ زہراؑ
دثارِغم میں چھپی ہے علیؑ کی تنہائی
لہو کا رنگ ہے عابدؑ کے پاک اشکوں میں
کہ ان کے دل میں چُبھی ہے علیؑ کی تنہائی
یہ زخم تازہ نہیں ہے بہت پرانا ہے
پیمبروںؑ سے چلی ہے علیؑ کی تنہائی
حیاتِ زینبؑ و حسنینؑ میں جو گرمی ہے
بکائے شب میں سنی ہے علیؑ کی تنہائی
فریب خوردۂِ رقص و نعت و نوحہ سن
تجھی سے گہری ہوئی ہے علیؑ کی تنہائی
نقاشؔ علی
www.islamimarkaz.com
www.bethat.tv